Eccu lu vutatu u padduc tantu aspettatu. Saria stata una bona di scrive quì ch’ella era statu vutatu, finalizatu è acettatu da tutti, issu pianu di sviluppu. Fussila puru.
A diritta hà preferitu parte da l’Assemblea di Corsica davant’à un debattitu ch’ùn li cunvenia. Poc’impreme, u ducumentu tantu bramatu hè statu vutatu listessu cù 38 voti nant’à 39. L’eletti di diritta chì facenu u musu deveranu accittà u fattu. Pocu vaudeville issa sessione quì. Pass’è veni di tutti in i curridori di a CTC, mughji, vezzi, è nuttate di cunversazione. Ghjucava a so vita issu Padduc in sta notte d’Halloween. Ognunu hà ghucatu a so carta, certi anu sudatu di più ch’è l’altri, e mascare seranu forse cascate. C’era da dumandassi s’è l’assemblea ùn s’avia da affundà sott’à tantu pesu, tanti scopi da cunsiderà.
