Cuntinuemu …
À voi, solu per dìvvi chì ciò chì ci impreme stamane, hè di ringraziavvi, propiu di core, per ciò ch’è vo ci avete arricatu stetima scorsa.
Cù i mei, salutemu tutti quelli ch’anu chjamatu, quelli chì ci anu scrittu, quelli ch’anu mandatu un messagiu, quelli ch’anu fattu un cumunicatu, quelli ch’è n’amu scuntratu, quelli chì sò venuti, quelli ch’anu fattu un tweet o spartutu u sustegnu nant’à FB è e rete suciale.
Dinò u nostru salutu fraternu à quelli di mare in là, corsi di fora è cumpagni di Sardegna, d’Alsassa, d’Uccitania, di Belgica, di Brittagna, d’Aosta, di u Paese Bascu, di Catalogna è ancu d’altrò.
Ringraziemu ste centinaie è centinaie d’amichi, di parenti, di paisani, di militenti, di naziunali, d’eletti corsi, pulitichi di tutti i partiti, d’omi è di donne ch’è no cunniscimu, è dinò di tanti è tanti ch’ùn cunniscia micca.
À voi solu per dìvvi ciò chì ci impreme oramai, ferma scrittu quì, cun voi è Per a Corsica:
« Cù tutta a nostra forza è per ciò ch’è no purtemu, CUNTINUEMU ! »
Saveriu Luciani
