(Corsicainfurmazione.org, Unità Naziunale, Publié le 27 octobre 2025)Dapoi a fine di sittembre, in seguita d’una deliberazione di u Cunsigliu municipale, u statutu di residente s’appieca nantu à a cumuna di Lopigna, trà Cruzzini è Cinarca.
Femu a Corsica vole salutà issa scelta pulitica forte di u merre, Alain Nebbia, è di u Cunsigliu municipale.
Cù sta misura presa da luttà contru à a speculazione è u spussessu, è da favurizà l’accessu à a prupietà à i Corsi è paisani bramosi di campà in terra soia, a cumuna di Lopigna si scrive in una storia principiata 11 anni fà.
➡️ Di ferraghju di u 2014, nantu à una pruposta di u so merre Jean Biancucci è dopu à una decisione di u so Cunsigliu municipale, Cutuli è Curtichjatu diventa a prima cumuna à aduttà u statutu di residente, nanzu à u votu di l’Assemblea di Corsica (d’aprile di u 2014).
➡️ Altre cumune di u Pumonti ani fattu a listessa scelta : Ortu, Ambiegna, Granacce, è Lopigna dighjà !
Malgradu a so annullazione da a ghjustizia amministrativa, isse deliberazione sò state tappe impurtantissime nantu à u chjassu di a rivindicazione di u statutu di residente !
➡️ Puru, a Cumuna d’Alzu in u Boziu cuntinueghja à mette in opera issu dispusitivu in piazza dapoi u 2014, chì hà ghjuvatu di mudellu à a versione nova vutata in Lopigna un mese fà.
Femu a Corsica si rallegra di issa mossa cumunale contru à a speculazione, u spussessu è à prò di l’accessu à a prupietà pè i Corsi.
U 19 d’ottobre scorsu, durante u so Cunsigliu Naziunale di rientrata, in Lavatoghju, Femu a Corsica hà cunsacratu un tempu impurtante à issa tematica di primura, chì rinvia à u dirittu di u populu corsu à campà in casa soia.
I merri, François Croce (Lavatoghju), Jean-Baptiste Filippi (U Mucale) è Jean-Marc Borri (Montegrossu), anu prisentatu l’azzione messe in ballu in e so cumune rispettive, in cuerenza cù i dispusitivi sviluppati da a Cullettività di Corsica è l’Uffiziu fundariu.
Cumplimenti è forza à tutte e cumune chì, ognuna à a so manera, in u cuntestu di speculazione è di spussessu, s’impegnanu da permette à i so figlioli di stallà si in casa soia !
Dumane, cù a custituziunalizazione di a leia particulare di i Corsi à a so terra, per via di u prughjettu di lege custituziunale rilativa à l’autunumia da fà sbuccà, s’apreranu diritti novi à u serviziu di u nostru Populu.
U cumbattu cuntinueghja !
FEMU A CORSICA
La commune de Lopigna rejoint la démarche de la Commune d’ALZI après l’appel de Nazione.
Produit CORSU E RIBELLU
