(Corsicainfurmazione.org, publié le 20 juin 2025) Dans le cadre de la session de la prochaine assemblée de Corse, les 26 et 27 juin, le groupe Avanzemu/Pnc va présenter une motion pour la langue Corse, qui est attaquée de toutes parts.
Saveriu LUCIANI : U Corsu, pilastru educativu è sucetale
VISTA a Dichjarazione Universale di i Diritti Linguistichi chì mentuveghja chì « ogni cumunità linguistica » hà u dirittu di dispone di i mezi necessarii per assicurà a trasmissione è a perennità di a so lingua ;
VISTA a cunvenzione nant’à a prutezzione è a prumuzione di a diversità di e spressione culturale di l’UNESCO aduttata da a Francia u 20 d’ottobre di u 2005 ;
VISTA a deliberazione 05/112 AC di u 1u di lugliu di u 2005 di l’Assemblea di Corsica appruvendu l’orientazione strattegiche à prò di u sviluppu è di a diffusione di a lingua corsa ;
VISTA a deliberazione di l’Assemblea di Corsica di u 26 di lugliu di u 2007 appruvendu « U pianu strattegicu d’imtempiatura è di sviluppu linguisticu per a lingua corsa 2007- 2013 », seguitatu in appicciu da : « lingua viva, un fiatu novu », cumitatu scentificu di u Cunsigliu di a lingua è di a cultura corsa ;
VISTA a deliberazione 13/096 AC di l’Assemblea di Corsica di u 17 di maghju di u 2013 dumandendu un statutu d’officialità per a lingua corsa ;
VISTA a deliberazione 15/083 AC di l’Assemblea di Corsica di u 16 d’aprile di u 2015 appruvendu u pianu « Lingua 2020 » ;
VISTA a deliberazione 16/140 AC di l’Assemblea di Corsica di u 23 di ghjugnu di u 2016 aduttendu a Cunvenzione di messa in opera di u pianu di sviluppu di l’insignamentu di a lingua è di a cultura corsa ;
VISTA a deliberazione 16/248 AC di l’Assemblea di Corsica di u 28 d’ottobre di u 2016 appruvendu e cunvenzione Accademia di Corsica/CTC è CTC/GIPACOR, riguardu à a messa in opera di u Grande Pianu Di Furmazione (GPDF) di l’insignanti in lingua corsa, chì permettenu una furmazione efficace di i Prufessori di e Scole ;
VISTA a deliberazione 17/021 AC di l’Assemblea di Corsica di u 27 di ghjennaghju di u 2017 chì dà un mandatu à u Presidente di u Cunsigliu Esecutivu di Corsica per neguzià cù u Ministeru di l’Educazione Naziunale a messa in opera d’un quatru nurmativu specificu per l’Accademia di Corsica ;
VISTA a deliberazione 17/240 AC di l’Assemblea di Corsica di u 28 di lugliu di u 2017 appruvendu u pianu « Media è lingua corsa » ;
VISTA a deliberazione 19/047 AC di l’Assemblea di Corsica di u 22 di ferraghju di u 2019 ch’hà decisu di lampà a chjama à prugetti « Casa di a lingua » ;
VISTA a deliberazione 21/171 AC di l’Assemblea di Corsica di u 1u d’ottobre di u 2021 purtendu aduzzione d’una muzione nant’à u Corsu, « a lingua di tutti, una lingua per tutti » ;
VISTA a deliberazione 22/186 AC di l’Assemblea di Corsica di u 25 di novembre di u 2022 purtendu aduzzione d’una muzione nant’à i mezi à aghjunghje per l’insignamentu bislinguu è immersivu ;
VISTA a deliberazione 23/089 AC di l’Assemblea di Corsica di u 5 di lugliu di u 2023 intitulata Autonomia ;
VISTE e pruposte cumplementarie è cunvergente di i cullettivi « Parlemu Corsu » è « Femula Campà », presentate, stu veranu scorsu, à a ripresentazione pulitica poi di modu publicu à l’opinione publica corsa ;
VISTU u prugettu « Scola 2030 », presentatu u 7 di maghju di u 2025 da l’Accademia di Corsica, nant’à l’orientazione di l’Educazione Nazione in Corsica per i 5 anni à vene ;
VISTA a lettera di l’11 di ghjugnu di u 2025 di u Presidente di a FCPE 2A, addirizzata à a Ministra di l’Educazione Naziunale, di l’Insignamentu superiore è di a Ricerca, contr’à l’insignamentu di a lingua corsa ;
CUNSIDERENDU chì, malgradu tante è tante avanzate cuncrete o puru ideologiche cuncernendu u sviluppu di l’insignamentu di a lingua corsa nant’à u so territoriu, quant’à livellu di e stituzione statale chè territuriale, ci campanu sempre quì idee è cumpurtamenti ritrosi è propiu ritrugradi à u scopu di minaccià l’avenimentu d’una sucetà bislingua ;
L’ASSEMBLEA DI CORSICA
RAMMENTA u postu, u rollu è l’usu di u Corsu in u sistema educativu isulanu ;
RICORDA di manera sulenne chì a lingua corsa ferma un’elemente fundamentale di l’identità di u populu corsu, per ciò chì tocca à attraversu a so trasmissione, a so valurisazione è l’usu soiu in ogni duminiu di a vita publica è suciale,
SUSTENE e misure di u pianu in partnaeiatu « Scola 2030 », pruposte da l’Accademiea di Corsica à prò d’una messa in via à a rientrata sculare di settembre 2025 ;
TORNA A AFFIRMA a so rivindicazione d’un statutu di cuufficialità ;
DUMANDA à Madama a Ministra di l’Educazione Naziunale, di l’Insignamentu Superiore è di a Ricerca, Elisabeth Borne, d’accumpagnà u sistema educativu isulanu ver di una generalisazione di l’insignamentu immersivu è bislinguu ;
DÀ U SO MANDATU à i Presidenti di u Cunsigliu Esecutivu, di l’Assemblea di Corsica è di i gruppi pulitichi per difende a quistione linguistica è sucetale ammentata cù u Ministru di l’accunciamentu di u territoriu è di a decentralisazione, François Rebsamen, in carica di u cartulare di l’evuluzione stituziunale di a Corsica.
Produit CORSU E RIBELLU
