Un l’averete forse micca rimarcata, ma dapoi qualchì ghjornu Valls è Hollande sò assai megliu. Temianu di francà u sogliu simbolicu di i 2000 miliarde di debbite, è avà chì l’affare hè fatta sò rassicurati. A prussima tappa : 100 % di u PIB – ne simu à 95,1 % -, torna un picculu sforzu è ci simu. Hè strana di sapè chì ogni siconda u Statu accresce e so debbite di a metà d’una paga di senatore.
Allora oramai ci hà da vulè à stringhje da veru : 21 miliarde d’ecunumie nant’à u bugettu di u Statu. È si sà chì a nostra amministrazione finanziaria hè cunnisciuta per a so cuncentrazione di sapientoni capace à manighjà i sciffri è à traccià curve di quelle chì facenu sunnià. Si dice ancu ch’ella hà da riparte a criscenza l’annu chì vene. Mi dicerete, seria appena cum’è a curva di pupularità, più fala, più risicheghja di ricullà un ghjornu. Ma à dilla franca – è senza pessimisimu alcunu – i guverni chì si succedenu dapoi 40 anni ùn sò mai riesciuti à fà e previsione bone. Tandu fermanu e prumesse.
Pichja pichja…
Allora si tira nant’à a funa, appena à dritta, appena à manca cù qualchì misuretta invece di rifurmà u fondu. È cum’è di solitu, chì curagiu ci n’hè pocu è micca, si pichja nant’à u travagliadore. È cù a nova pulitica familiale, l’allegria di un ciucciu in casa turnerà prestu prestu un lussu.
Produit CORSU E RIBELLU
