Breaking News

Corse, Corsica : Prucessu Colonna : « Caminu » dà Fabiana Giovannini

« À a fin’di u caminu, ci serà a nucenza d’Yvan Colonna » anu dettu i so avucati chì si sò purtati in Corte di Cassazione sùbitu dopu. Ùn sfiàtanu micca malgratu ssu culpacciu torna di a ghjustizia francese. Dopu à sette settimane di prucessu, ott’anni di priggiò, ma dòdeci in galera, Yvan Colonna hà pruvatu un antra volta à fassi sente. Ùn ci hè ghjuntu. In u curritoghju di a ghjustizia di Statu, ùn si pò rivene in daretu. Mai, ùn hè ghjuntu à sguassà in capu à sta ghjente u pustulatu di a culpabilità ch’elli li anu messu à dossu. Elli, vale à dì u Statu, à i so più alti livelli, ma dinù i membri di u cumandò chì si tènenu a verità senza permètteci d’avvicinalla. Chì s’hè passatu ssu 6 di ferraghju 1998 ? Quale ci era in carrrughju ? Cumu ponu accettà di fà pacà un antru à a so piazza ? Perch’è i membri di u cumandò chì pruttègenu altri membri fora, ùn pruttègenu micca à Colonna s’ellu hè culpèvule ? Ssu fattu solu basta à cunvìncesi di e cuntradizioni di u comandò.

« Hè duru di parlà. Ste parulle, l’aghju dette decine di volte è ùn ghjungu più à truvalle… Dapoi 1999, a mo vita hè diventatu un suniacciu, hè stata scavaghjata. Aghju fattu ottu anni di priggiò per un crìmine ch’ùn aghju micca cummessu. È l’annate di priggiò càmbianu a ghjente è i raporti ch’omu hà cù elli…Face cinque anni ch’ùn aghju più vistu a mo mamma, ùn pudia più vèdela pienghje à u parlatoghju… Da a mo vita, ùn aghju mai avutu paura cum’è oghje, mancu durante a mo fùghjita. Averìa mille cose da dìvvi, à voi è à a partita civile… Aghju sempre avutu cunvinzioni, ne sò fieru. M’aiùtanu à tene ma ùn fàcenu micca di mè un assassinu. Aghju sempre avutu u rispettu di a vita. Sò statu spendifocu durante u mo serviziu militare per pudè salvà a ghjente. Sò statu “maître-nageur” in Corsica per salvà a ghjente. N’aghju salvatu da a morte è m’arricordu sempre avà d’un Allemanu ch’ùn simu ghjunti à salvà. Trà a mo vita d’eri, nanzu à a priggiò, è a mo vita di militente, aghju sempre avutu u rispettu prufondu di a vita. Ci hè una cuerenza. Di 1993, cum’è parechje centinaie di militenti aghju cundannatu l’assassiniu di Robert Sozzi. Ùn u cunniscìa micca ma l’aghju fattu perch’è era un omu è un militente. Aghju avutu a stessa andatura di 1986 quandu u FLNC hà tombu dui Tunisiani in Aiacciu. Trafichenti di droga o nò, nimu ùn pò avè u drittu di morte nant’à a ghjente… Avete a mo vita in e vostre mani Ùn aghju mai tumbatu à nimu. Ùn aghju mai partecipatu à l’attaccu di a gendarmeria di Petrusella, ùn aghju micca partecipatu à l’assassiniu di u prefettu Erignac. Vi precu di crèdemi. So nucentu, nucentu in veru. Aghju u laziu di rientre ind’è mè, u laziu di ritruvà un pocu di pace, sò faticatu, assai assai faticatu. Ùn ne possu più di bàttemi. Sò nucentu ».

 

Puru li tocca à bàttesi torna. È à noi à dalli fede, speranza è sustegnu nant’à ssu caminu di lotta.

Appii curagiu o Yvan.

 

Fabiana GIOVANNINI.

 

Faites passer l’information autours de vous en cliquant sur :

Produit CORSU E RIBELLU

bandeauribelluteeshirt (1)

Produits à partir de 13e

WP2Social Auto Publish Powered By : XYZScripts.com
error: