« Si n’hè andatu à l’eternu u militanti di prima trinca Orsu Petru Larenzu Angelini dettu Larenzu à l’età di 78 anni »

(Corsicainfurmazione.org, Unità Naziunale, publié le 8 avril2026) Si n’hè andatu à l’eternu u militanti di prima trinca Orsu Petru Larenzu Angelini dettu Larenzu à l’età di 78 anni.

Ci hè un viotu oghji…
un silenziu chì pesa.

U so stintu paisanu,
a so manera d’essa, di stà à paru,
tuttu què si sintia… senza spiegazioni.

A lingua corsa, par eddu, ùn era micca una scelta.
Era a vita stessa.
Era l’unica manera di dì u mondu, l’unica manera d’essa.

Ùn hà mai circatu à fà di più ma sempri fattu ghjustu.
È forsi hè què chì faci a sfarenza.

Era di issa ghjinerazioni chì hà campatu à l’usu nustrali
senza mai dumandà si s’eddu ci vulia à cambià. Senza mai rifiatà.

Hà tinutu.
Simpliciamenti.

È sin’à l’ultimu, hè firmatu fidu à eddu stessu.

Vulia mora è essa intarratu arrittu…
com’è una manera d’essa.
Cum’è una manera di dì :
ùn mi sò mai piegatu ind’a vita quant’è ind’a morti

È oghji, ancu puri in la morti,
ferma arrittu in i nosci ricordi.

O Larè,
ùn hè micca solu un omu chì si ne và.
Sì una manera d’essa chì ci lasci.

Ma issa manera,
s’edda campessi sempri,
hè parchì omi com’è tè l’ani fatta campà senza mai parlà ni.

U ringraziemi par quissa.
Di cori.

Mandemi i so dulianzi afflitti à a so moglia, à i so dui fiddoli Vannina è Saveria, à i so fiddulini, Marcandria, Nicolu, Arghjenta è Ghjuvan’Natale è Don Petru i so puffiddoli, à i so parenti, appiciccaticci, amichi è à tutti quiddi chì l’ani tinutu caru.

Riposa in Santa paci.
È stà tranquillu…
ùn ci scurdaremi di ciò chì tù eri.

L’accumpagnaremi par u so ultimu viaghju in lu so paesi caru di Guagnu, oghji à 3 ori di dopu miziornu in la ghjesgia San Niculaiu.