« l’avvene di a Corsica, oghje ghjornu minacciatu più chè mai » – ALERIA 1975-2025

(Corsicainfurmazione.org, Publié le 20 aout 2025) Seranu 50 anni stu 22 d’aostu ch’ella « si discitò a storia » in Aleria.

Quellu venneri d’aostu di u 75 s’hè scrittu per u sempre in u solcu di e nostre lotte.
Sti dui ghjorni di « l’affare d’Aleria » ùn sò forse u principiu di e mosse naziunaliste settantesche, ma fermanu di sicuru, in a memoria cullettiva, un simbulu maiò, à mezu à tant’atti, di resistenza di u Populu Corsu.
U 22 d’aostu 2025 seremu in Aleria, da naziunalisti è da corsi, uniti in st’attu patriottu chì ci invita à celebrà st’anniversariu.
Hè bella chè capita chì st’Aleria di u 75 hè un passu di storia chì porta listessa bandera chè quelle di e prime rivolte di u 1729 è di i so 40 anni di guerra, di tutte e resistenze Corse di tandu, aldilà di quelle l’entre di l’anni sessanta, sin’à u seculu vintunu è l’ultime manifestazione di u veranu di u 2022.
Iè, à sti patti, st’Aleria di u 75 à noi tutti ci appartene.
Iè, st’Aleria hè di tutti, à nome di e nostre primure sacre.
Aleria di 50 anni fà volta quì per turnà à ricusà l’orisonte murtale prumessu da u culunialisimu è pruclamà a nostra vulintà d’esiste da corsi in u Mediterraniu.
Sia questu u so messagiu sulenne, quellu d’ùn rinuncià mai, di resiste per esiste, decisi più chè mai, à prò di a lotta d’un populu in periculu di morte.
Ma sia dinò stu 22 d’aostu quellu chì invita perfine à tutti i naziunali sta necessità d’apre una strada nova per l’avvene di a Corsica, oghje ghjornu minacciatu più chè mai.
Iè, o Corsi, a Corsica hè una nazione vinta ch’hà da rinasce.
È cusì sia !
PNC