(Corsicainfurmazione.org, Unità Naziunale, Lutte de masse, Publié le 11 aout 2025) Azzioni, oghji, di Core in Fronte in Portivechju pà aiutà una famidda corsa à un alloghju suciali.
A sezzioni suttanaccia di Core In Fronte Porti Vechju-Bunifaziu, incù membri di u novu associu «Salv’a Leva» ani participatu à difenda una famidda corsa di i nosci loca, cunfruntat’à prublema d’accessu à l’alloghju.
Stu prublema si poni d’una gravissima manera in a cità di Portivechju, com’ in altrò nant’à monda cumuni.
Metti in rilievu, in cori di a noscia vita cummunitaria, u pesu criscenti di tutti sti «appartementi loft» è altri casoni à prezzi scemi chì, poc’à pocu, lampani fora i Corsi, ghjovani o vechji.
PAR PUDÈ CAMPÀ IN TARRA NOSCIA!
Da l’altra parti, monda aghjenti di u rughjoni aspettani par pudè avè un alloghju suciali, ubblicati par certi à essa ustaggi di sti appighjunatori vinditori di miseria chì i mettini in situazioni di pricarità è di ricattu. Certi volti sò custretti à abandunnà u rughjonu pà truvà un alloghju in altrò.
A sizzioni piddarà, da quì à pocu, cuntattu incu u merri di Portivechju par truvà una vera suluzioni par a famidda cuncirnata.
Farà dinò cunoscia, à i so eletti di a Culletività di a Corsica, a rialtà rughjunala di a quistioni di l’accessu à l’alloghju in u suttanacciu.
Infini, ci sarà altri iniziativi par dinunzià spussessu fundiariu è culunizzazioni di pupulamentu è dritti di i paisani à pudè campà è travaddà in tarra soia.
Par Portivechju, cità paisana,
Par a tarra corsa à i paisani,
Contr’à u sfruttamentu suciali,
Par una Corsica libara è spannata.
Core in Fronte
Produit CORSU E RIBELLU
