(Corsicainfurmazione.org, Unità Naziunale, Publié le 1er Aout 2025) Hè mortu u nostru amicu, militente è fratellu di lotta, Felix Dagregorio.

Patriottu corsu, sindicalistu, Felix era di tutte e mosse pè i diritti storichi, naziunali è suciali di u populu corsu.
Marinaru à a SNCM, ognunu si ramenta l’azzione di u STC, di settembre di u 2005, nant’à u battellu Pascal Paoli pè dinunzià a privatisazione di a cumpagnia, vulsuta da u Statu francese, è pè rende un arnese di sviluppu ecunomicu è marittimu à a Corsica.

Felix u to ingaggiamentu in a lotta naziunale era ghjustu è sinceru. U to esempiu fermerà.
Serai sempre à fiancu à noi in u cumbattu pè a Corsica Nazione.
À a so cumpagna Nathalie, à i so figlioli è à l’inseme di a so famiglia è di i soii, Core In Fronte face e so parte afflite di dolu. Ch’ellu sia in locu d’eternu riposu.
Core in fronte

Affaire du Pascal Paoli 2005 (Suite)

—*

Hè un ghjornu carcu di tristezza pè u STC Si ne andatu ab’eternu, Felix Dagregorio. Omu d’azzione è di curagiu, sempre prisente à fiancu à noi è sempre fidu à i valori chè no purtemu. Militente sinceru è omu d’onore, a so prisenza s’hè fatta sente in parechji mumenti storichi, cume quellu di u battellu « Pasquale Paoli ». In ogni addunite à prò di a difesa di i diritti di u nostru populu à decide per ellu stessu, Félix era quì. À Nathalie, à i so figlioli, à a so famiglia, à i so amichi è à tutti quelli chì l’anu cunnisciutu è stimatu, u STC prisente e so più affettuose cunduglianze. Felix, u to ricordu è u to esempiu firmeranu sempre à fiancu à noi. Ùn ci scurderemu mai. Riposa in pace, caru fratellu di lotta.
STC

—*

Aiutu Paisanu · Si n’hè andatu à l’eternu Felix Dagregorio. Patriottu corsu è sindicalistu, era passatu in prucessu in u 2009, cù d’altri militenti, per l’affare di u Pascal Paoli di a SNCM in u 2005. Avia difesu l’interessi cullettivi di a Corsica di pettu à e scuccunerie di u Statu è di certi fondi capitalisti. Chì u so ricordu sia sempre vivu!