(Corsicainfurmazione.org, Unità Naziunale, Publié le 22 juin 2025) Era sempre quì, ellu, u vechju cumpagnu di strada Purtivichjacciu, ardente militente di a causa naziunale.
Oghje a so cara cità di Portivechju è i so pasciali pienghjenu à Gérard, u babbu, u babbone, l’amicu, l’elettu, l’Omu ch’’ellu era, da e piaghje di l’Afretu à a muntagna di U Spidali.
Dicenu ch’ellu era di i nostri, ch’ellu era u nostru, impegnatu quì, notte è ghjornu, in i mumenti d’alegria, di gioia è di festa, è in e stonde più pessime di a vita è di e lotte di stu populu.
Sanu ch’ellu hè statu di quelli ch’ùn anu mai cappiatu, moltu più in quelli tempi di dubbitu è d’addisperu, battendu u so rughjone per difende i diritti è a libertà di stu paese è custruì un campà altrimente per tutti.
« A to voce è u to fiatu ci seranu sempre à fiancu »
Oghje, Gérard, pienghje Portivechju cù i so pasciali ingiru à tè, l’Omu bravu, l’Omu pienu, generosu, l’Omu fidu, d’anima è di stintu Corsu.
Tamanta pena ch’è tù ci faci o Gérard…
Amicu caru, accumpagnemu a to partenza propiu cummossi è tristi, cù l’affettu, l’amicizia è a fede, cù i toi, figlioli è figliulini, cù l’amichi Purtivichjacci è di Corsica sana.
Intantu sta santa preghera per rispettu, omagiu è ricunniscenza, per quellu chì viaghjerà sempre à fianc’à noi .
Ti sia dolce u riposu, ti sia lebbia a terra di Corsica à locu santu, ti sia sincera è bellissima a to eternità.
Avvedeci, amicu caru.
Avvedeci o Gérard. »
PNC
Produit CORSU E RIBELLU
