(Unità Naziunale, Corsicainfurmazione.org, Publié le 24 avril 2025, maj 26 avril 2025) Addiu amica. Christiane Muretti si n’hè andata l’altreri ver di u so ultimu viaghju. À tutti, sta partenza ci punghje u core è ci arreca a so tristezza è un dulore propiu prufondu.
Christiane era di i Nostri, naziunalista à l’anima, militente di sempre di a causa naziunale. Spartia cù noi tutti listessa fede, listess’amore è listessa spera per a Corsica è u nostru populu. Marti matina, in l’accumpagneremu à locu di riposu eternu. È s’ellu ci vole à tene à mente qualcosa di ciò ch’ella fù sta donna corsa sincera è piena d’umanità, serà stu ritrattu magnificu, in finestra, in Bastia, à bandera in manu, un ghjornu di manifestazione. Di core, purghjimu e nostre cunduglianze afflitte à Anna Laura è à Tony, turnendu à dilli u nostru sustegnu fraternu in ste pessime stonde. À tè Christiane cara, chì parti, u nostru affettu cù centu preghere. Addiu amica, è ch’è tù possa truvà, à cant’à u to figliolu smaritu in lu fior’ di l’età, a pace in l’eternità. Amme è cusì Sia.
Saveriu Luciani.
Partitu di a Nazione Corsa · Cù tamanta tristezza, u Partitu di a Nazione Corsa è tutti i so militenti salutanu di modu sulenne a memoria di Christiane Muretti. Si n’hè andata eri, vinta da a malatiaccia, dopu avè luttatu parechji mesi propiu curagiosa. Christiane era naziunalista à l’anima è spartia cù noi listessa fede, listess’amore è listessa spera per a Corsica è u so populu. Di core, purghjimu e nostre cunduglianze afflitte à Anna Laura è à Tony, turnendu à dilli u nostru sustegnu fraternu in ste pessime stonde. À tè Christiane cara, chì parti, u nostru pientu è a nostra preghera. Addiu amica, è ch’è tù possa truvà a pace, à cant’à u to figliolu, in l’alta eternità dolce, clemente è pia. È cusì sia.
Associu Aiutu Patriotticu · Dolu. Si n’hè andata à l’altru mondu Christiane Muretti Aillaud, mamma di a nostra carissima amica è militante Anna-Laura. Sustegnu maiò di a causa di l’anziani prighjuneri pulitichi, Christiane hè sempre stata à fianc’à noi è à fianc’à elli, ancu quandu a malatia a tramanava. À Anna-Laura, à Toni u so maritu è à tutti i soi, prisentemu e nostre cundoglianze afflitte è l’assicuremu di a nostra affezzione sincera. A salma serà depusitata dumane u 27 d’aprile in l’oratoriu di l’Immaculata Cuncezzione in Bastia à 9 ore è mezu. A ceremonia religiosa si tenerà marti u 29 d’aprile in a Ghjesgia San Ghjuvan-Battista in Bastia à 10 ore è mezu. Ch’ella riposi in a Santa Pace di u Signore, à fianc’à u so figliolu caru Nicolas.
Paul-Felix Benedetti · Christiane Muretti si n’hè andata à l’eternu. Patriotta corsa, militenti naziunalista, era sulidaria di i prighjuneri pulitichi. In a so vita, hà sempri fattu valè a so forza è u so curaghju. Ritrova oghji u so fiddolu Nicolas. À Tony, à Anna Laura è tutti i soii, facciu i me parti di dolu. Ch’edda sia in santa paci.
Partitu Femu a Corsica · Si n’hè andata à l’altru mondu Christiane Muretti, patriotta di prima trinca, impignata assai à prò di a causa di i prighjuneri pulitichi corsi. Femu a Corsica saluta a memoria d’una donna curaghjosa è forti di pettu à una vita è una malatiaccia chì ùn l’avarani risparmiata. À Tony, à Anna Laura è i soii, Femu a Corsica porghji, di cori, i so cunduglianzi afflitti è u so sustegnu fraternu in sti stondi adduluriti. Ch’edda riposi in Paci, à fiancu à u so figliolu caru.
Produit CORSU E RIBELLU
