« Les 3, 4 et 5 avril 1985, se tiennent en Guadeloupe à l’initiative de l’UPLG, la Conférence des dernières colonies françaises » – #Corse

(Unità Naziunale, Corsicainfurmazione.org, Lutte Internationale, publié le 4 avril 2025) Les 3, 4 et 5 avril 1985, se tiennent en Guadeloupe à l’initiative de l’UPLG, la Conférence des dernières colonies françaises regroupant des organisations politiques de Guadeloupe, de Martinique, de Guyane et de Kanaky.

Jòdi jédi 3 avril 2025. Sa ka fè ègzaktèman 40 lanné l’IPLG té òwganizé konférans a Dènyé koloni fwansé nou té kriyé Konférans a Bònvèn. Adan konférans-la sa té ni rèprézantan a Gwadloup, Matinik, Gwiyàn , Kanaky.  Lézòt koloni a fwansé pa té la. Onlo jounalis a laprès fwansé té la. Té ni jounalis étranjé osi. Konférans a Bònvèn té ni on gran rézilta malgré tousa fwansé fè pou anpéché’y fèt. Sé té on gran moman politik pou nou. L’IPLG montré kapasité i té ni pou òwganizé, mobilizé fòs a’y , pwan an chaj tout envité a’y é asiré sékirité a tout moun i té envité.
Sonǰé Bònvèn.
On gran moman adan istwa à mouvman patriyotik-la é a l’IPLG

Bònvèn, 3, 4 é 5 avril 1985. On pâti a konférans-la fèt adan lotèl « Les Alisées » a Lòtbò Moul lòt pâti a konférans-la sété alantou a moulen Bònvèn a Lansbètran. Gwadloupéyen té déplasé kon kann pou assisté à konférans-la sa.

Lotèl Les Alizées té jéré pa travayè a lotèl-la sendiké adan l’IGTG. Yo té désidé okipé lotèl-la pou anpéché lé kapitalis pwofitan té mèt yo dèwò pou vann lotèl-la an pyès détaché. An tan la-sa tout lé patriyòt té ka maché ansanm. Òwganizé konférans-la koté-la sa sé té on mannyè pou pòté on pal pou lé travayè an lit kyenbé.

Moulen Bònvèn té adan on zòn péyizan té ka okipé tè an Nò-GrannTè. Té ni on gwo travay a fè pou aménajé èspas-la pou rèsèvwa manifèstasyon-la. Plis ki mil moun té la pou viv moman solidarité entèwnasyonal-la sa.

An dèwò a rèprézantan a lé òwganizasyon politik a lé dènyé koloni, té ni rèprézantan a déotwa parti politik révolisyonè a fwansé. Té ni onlo moun a laprès ki té sòti an Fwans é an dòt péyi ki té la. Adan tout moun IPLG té envité touséla ki té ka vin dè péyi étranjé touvé yo baré lè yo mèt pyé a tè an Gwadloup é té oblijé routouné a kaz a yo. Sé sa ki rivé tout envité ki té ka vin dè Karayib-la. Òwganizasyon politik a Réyinyon é Polynéziki té envité pa rivé vin.

Malgré tousa fwansé fè pou fè konférans-la échwé, konférans-la té byen réyisi toubòlman. Lanné apwé lé òwganizasyon wouvwè yo a Bruxelles adan ansent a Linyon Ewopéyèn pou kontinyé travay a konférans-la. Sété on dézyèm gran moman adan Konférans a Bònvèn.

40 lanné apwé, lit a lé pèp kolonizé a fwansé ka kontinyé. Nou ka kontinyé trasé chimen pou libèté a pèp Gwadloup, pou lendépandans a péyi Gwadloup.

Nou ka kontinyé di :

Nou sé Gwadloupéyen

Nou sé on pèp

Nou ni dwa a viv lib asi tè Gwadloup ki tan-nou

Nou ka travay pou kominoté entèwnasyonal rèkonnèt dwa an-nou

É soutyenn nou kont kolonyalis fwansé

Nou ka goumé pou souvrènté a péyi an-nou

Nou ka lité pou lendépandans a péyi Gwadloup

Nou ké gangné

IPLG

Lapwent, 3 avril 2025