#Corse #Furiani92 : Mimoria strappata chi ún si scurderà mai…

U 5 di maghju di lu 1992. Allora chi nimu l’aspettava, Lu SCB riceve à l’Olympique di Marsiglia per ghjucà à a mezza di finale di a cuppa di Francia. A Corsica intera si move fin’à lu stadiu di Furiani per partecipà à iss’eventu quasi storicu. 20’20.

Photo AFP

Cio chi duvía esse un spettaculu, una spartera, una festa hè diventatu in pochi minuti u sugniacciu pechju chi si putía imaghjinà. Sprunfundeghjanu i gradini di a tribuna Nord costruita apposta per quella partita. Diciottu morti, più di 2400 ferriti. E tutti quell’affaracci chi cunnuscimu troppu bene oghje. Ritrattu d’una ferrita, vent’anni dopu.

Si sente spessu dì chì e ferite chi ùn guariscenu mai, sò quelle di a mente. Quelle stesse chì manc’una spiegazione ùn riesce à fà ragiunassi lu core e a testa…

Vincente hè una bella donna appena misteriosa chi pare, cum’è lu mare, abbunacciata.Intantu, basta à ramentà li una data pè ciunfassi incù ella dentru ricordi cusì stringati chi vi si pare di turnà à vive li.« Ùn aghju mai pututu smenticà u sole d’issu ghjornu, l’udori di issu veranu particulare l’allegria è l’eccitazione cumune. Cù lu tempu, capiscu chì tuttu era troppu bellu, quellu ghjornu, e cose ùn pudianu esse altrimente. Cum’è s’è lu celu vulia fà ci capì chi si tramava qualcosa […] È issu rumore ! Quasi cum’è lu scatabottu di lu trenu… Mai mi ne scurderaghju, mi fà frizzinà ancu oghje […] »Vincente avia guasi 18 anni, quella sera di lu 5 maghju 1992. Ùn hè mai stata passiunata da u ballò. Era ghjovana. Vulia fà cum’è l’altri. Esse ci anch’ella à sparte a cummossa di a festa. Hè stata ferita, abbastanza. L’anu ritruvata i so amichi, stramurtita. Micca subitu perchè, durante a capulata, altre personne li sò cascati annantu. Só stati i so scarpi à salvà la, vistu chi ùn si vedia chè questi à mezu à iss’intrecciu di corpi e di ferru.U restu d’issa storia a cunnuscimu puru bè…Per Vincente, sò stati trè anni di rieducazione ma anc’oghje certi dulori fisichi si fanu sempre sente, ogni tantu. Manc’u corpu si sminteca.

Dopu issa disgrazia, ùn si ricurdava di tanti affari. « E sensazioni sò vultate à misura chì passava lu tempu. Certi imaghjini mentre chì stavu sunniandu, altre cusì, fora à lu sinemà, à lu risturante, passeghjandu à mezu à ghjente ; aghju messu un certu mumentu à capì chi a mo vita ùn saria più cum’è prima […] è po’ pian pianinu si scupria a verità annantu à u fondu d’issa tragedia. Allora aghju imparatu à anguscià mi. »Aiutu psiculoghjicu ùn ci ne hè statu. Per cumbatte e so paure, Vincente si facia e so propie spiegazioni ; cum’è per esempiu u fattu di pensà chi si avia a diccia di salvassi da u crollu eventuale di un casamentu standu à l’ultimu pianu piuttostu chè à lu primu. E so apprensioni è e so terrori, hà imparatu da sola à vive le, sempre à agguattà a cosa chi ùn và micca o à sente la ancu quand’ella ùn esiste… Ciò chì l’hà fatta sorte si ne, ghjè di realizà a furtuna chì hè di esse sempre viva.Vincente ùn colla più annantu à i maneghji, hà pruvatu per sapè, per vede ma ùn vale micca a pena… Mai più ùn riturnerà à lu stadiu di Furiani, ùn li piace mancu tantu di passà ci davanti. Cum’è tutti i Bastiacci seguita, ma ella di luntanu, a vita di lu SCB.« Issa disgrazia m’ha arrubatu a mo candidezza, a temerità di a ghjuvintù. Ún si passa micca un ghjornu senza ch’o ci pensi ancu solu appena… Ghjè cusí. Face parte di me, per sempre. »Eccu. Certe ferite ùn si vedenu micca perchè ùn sò fisiche. Ún si chjudenu mai veramente per colpa di a mimoria. Vent’anni sò passati dapoi quella sera. E cose ùn saranu più listesse, mai. Ma a vita deve cuntinuà, sempre, ancu incù lu risicu di ùn fà più casu ma senza smenticà.Vincente hà firmatu a pitizione per chi ùn si ghjucassi mai più à balló u 5 di maghju, per esse sicura chì più nimu smenticherà mai quella disgrazia chì hà culpitu cusì forte u nostru populu. Ghjè a so storia. Quella stessa di tutti quelli chi ùn sò più, di tutti i feriti. Di noi tutti.

Stefany Acquatella

Vous aimez cet article ? Faîtes-en profiter vos amis !
Faites passer l’information autours de vous en cliquant sur :

Produit CORSU E RIBELLU

bandeauribelluteeshirt (1)

Produits à partir de 13e

WP2Social Auto Publish Powered By : XYZScripts.com
error: