Breaking News

#Corsica – L’autunomia in Auropa [Pnc-Ghjuventù]

Dui anni fà, emu fattu nasce u PNC Ghjuventù. A nostra primura  era di riflette à l’avvene di a Corsica ma per noi ùn si pudia pensà à st’avvene senza parlà di a nostra piazza in l’Auropa. A nostra adezione à EFAy* hè venuta tandu di manera naturale.

A settimana scorsa, EFAy hà tenutu a so cunsulta generale 2012 in Ljouwert, cità Ollandese di Fryslân, attempu  à quella di EFA. C’hè andata una delecazione di u PNC, ind’è a quale ci eranu parechji riprisententi di u PNC Ghjuventù.

Dopu à uni pochi di capatoghji chì c’anu fattu pensà ch’è n’ eramu forse annuchjati, c’emu  avutu da lascià a medità di u nostru gruppu in Corsica, è ùn eramu più chè trè à ritruvacci culà, à mezu à una trentina di giovani d’altri partiti naziunalisti d’Auropa.

U primu ogettivu d’una cunsulta generale hè forse l’urganisazione amministrativa d’un gruppu. Ci hè dunque vulsutu à parlà di statuti, regule, bilanci è bugetti, sugetti rompicapi ch’ùn si ponu quantunque micca lascià da cantu. Ma emu dinò parlatu di sugetti chì sò direttamente in leia cù e nostre rivendicazione.

Frà i testi chè l’urganisazione hà vutatu, ci ne quattru chì sò per noi impurtantissimi. Dui sò stati pruposti da un antru partitu : unu chì dumanda ch’ogni regione possi sceglie u modu d’insignamentu di a so lingua, è l’altru ch’ella sia fatta una sfarenza trà a naziunalità è u statu induv’ellu si campa. I dui altri eranu testi pruposti da u PNC Ghjuventù: u primu era in favore d’un adopru pussibule di e lingue minuritarie à u Parlamentu Auropeu, è u secondu trattava di ciò ch’ella pò purtà L’Ecunumia Suciale è Sulidaria.

I testi pruposti da l’altre urganisazione, è i dibattiti ch’elli anu fattu nasce, ci anu permessu di vede ciò ch’ellu si passa in altre regione d’Auropa.

Ma ciò chì m’hè parsu u più interressante durante sti dui ghjorni, ùn era micca a cunsulta ella stessa, ma tutti sti scontri chè n’emu fattu, è tutte e discussione chè n’emu avutu aldilà di a cunsulta. Aracunesi, Galissiani, Andalù, Baschi, Catalani, Tiroliani, Valdossiani, Sardi, Danesi d’Allemagna, Allemani di Danemarcu, Flamandi, Scuttesi, Irlandesi, Gallesi, Frisoni è tant’altri ! Tanta ghjente chì lotta per a ricunniscenza di u so populu… Certi anu ancu menu pudere puliticu chè noi (è ùn n’avemu tantu…), è certi di più. Ma tutti volenu a listessa fine : pudè sceglie u so avvene ! Ghjè vera chì quessa, a sapiamu digià. Ma ciò ch’aghju amparatu culà, ghjè a realità di ste lotte. Cum’elli facenu elli ? Qualesse sò e so rivindicazione ? I Scuttesi dumandanu l’indipendenza, i Catalani d’Espagna dinò. I Catalani di Francia, elli, volenu in primu locu ciò chè n’avemu noi (iè, per noi ùn hè tantu, ma u pocu  hè dipiù chè nunda !).

In fattu, ciò ch’aghju ritenutu, ùn hà prezzu ! Stu viaghju m’hà permessu d’arricurdammi  da induve no venimu, ciò ch’hè statu vintu in trent’anni di lotta, è sopr’à tuttu, ciò chì pò sempre esse fattu. Stu viaghju m’hà ramintatu ch’ellu ci vole à sperà, è chì, un ghjornu, l’autunomia serà a nostra realità !

Anne Tomasi, per u PNC Ghjuventù

*EFAy : « European Free Alliance for Youth », inglese per « Unione Libera Auropea per a Ghjuventù »

Vous aimez cet article ? Faîtes-en profiter vos amis !
Faites passer l’information autours de vous en cliquant sur :

Produit CORSU E RIBELLU

bandeauribelluteeshirt (1)

Produits à partir de 13e

WP2Social Auto Publish Powered By : XYZScripts.com
error: