Produit CORSU E RIBELLU

X

Un calani i mossi di a noscia ghjuventù. Dapoi parechji sittimani in ogni paesu e cità l’accolti urganizzati mosciani ‘ssa  nova cuscenza d’essa pà campà in tarra soia.

In Portivechju i ghjovani, com’è altrò  in Corsica, si so adduniti davant’à u liceu. Pà prutistà contr’a viulenza chi l’hè fatta. Pà prutistà quandu unu hé gravamenti fertu. Pà’ prutistà contr’a riprissioni. Pà’ prutistà contr’à u razzisimu contr’à i corsi.
Issi mubilisazzioni mettini in rilievu ch’issi novi generazioni , in u filu trasmissu da I’indiatura forti e da I  sacrifizi di i piu anziani, cuntinuighjani, à a so manera, a fà valè i nosci dritti.

Di sicura, ùn piaci à  l’autorità francesi chi ricusa sempri ciò chi no semu.

GHJUVENTÙ CORSA SEMPRI RITTA !

A chjusura di u Statu francesu, u so autoritarisimu  mosciani bè chi da iddu ùn si po aspittà nudda è chi  i nosci mubilizzazioni pupulari di pettu à l’agressioni devini cuntinuà. Ma ci puddemu  aspittà à certi intrapulati pà circà à indebulì i nosci ultimi successi com’è l’ultimi alizzioni territuriali.

L’ultima manifestazioni di i ghjovani in Bastia s’hè caratterizzata da a sò maturità. Erani millaia a tistimunià a so sulidarità à Massimu, fertu in Reims, e à muscià ch’iddi so capaci di mubilizzassi da par iddi, soli soli, senza fassi manipulà.

In Portivecchju, à u mumentu d’issi mossi, i ghjendarmi hani intarrugatu una di i porta voci d’issi ghjovani. A prova ch’iddi s’impauriscini d’issa cuscenza chi cresci. A prova chi una ghjuventù urganizzata da par idda, in u solcu tracciatu da una lotta naziunala purtata da parecchji seculi  rapprisenta un priculu pà i sirvizii di u statu francesu .

A noscia lotta contr’à l’inghjustizia è pà u nosciu drittu à scedda u nosciu avvena cuntinuighja.

Forza Ghjuventù ! L’avvena sé tu !

Faustina di A Prugna