X

https://www.facebook.com/notes/fabiana-giovannini/un-mese-dopu-%C3%A0-ch%C3%AC-ne-simu-/1014224818633815

« Vi ne surtite ? »… a dumanda rivene suvente, mischiu di maraviglia è d’un zinzichellu d’angosce di l’amichi chì si fàcenu penseru per noi, pensendu à a mansa di travagliu chì ci occupa.

Rispondu eiu di manera spuntànea : « mi campu ! » Ùn hè micca un mancu di sèriu o segnu di sfacciatezza… hè verità ! U travagliu pò ci hè. Dorme, si dorma pocu ! U tempu hè cortu. L’impazienti sò numarosi, è frà elli l’amichi pè u più !… Ma u travagliu hè appassiunante è simu ingordi di fà ! E squatre à u nostru serviziu sò dinàmiche è cumpetente, bramose anch’elle di travaglià è di rializà, anu quasi di più fame chè noi ! Ùn simu micca tècnichi, sò elli l’esperti à u nostru serviziu. Noi, u nostru travagliu hè pulìticu : riurganizà, currege i difetti, o e derive à le volte, vale à di « nurmalizà », rimette a règula induv’ella hè sparita, pò dà l’indiature nove, decide è accumpagnà e decisioni da ch’elle si rializèghjanu… in fatti, ridà cunfidenza in u casale CTC, à l’internu è à l’infora, rimette l’òrdine in u disòrdine, impone sumerinu induv’ellu s’era stallatu l’incuerenza, l’irragiunèvule è l’assurdu. Eccu dapoi qualchi settimana e nostre priurità ! Chede decine di riunioni à a settimana, scontri, discussioni, cuntrasti.

fabiana giovannini 17dec2015simeoniTalamoni (12)

Mansa di raportu à leghje, currege, rifà quand’ellu ci vole. Chede pazienza, ascolta, mediazione, interventi. Chede presenza, autorità è à tempu sustegnu. Eccu. Basta a vuluntà pulìtica. È quessa l’avemu. Basta a voglia di riesce, è quessa ci occupa notte è ghjornu. U presidente di l’Esecutivu hà fattu sapè i so scopi pè e simane à vene : fà u puntu di e finanze è di u funziunamentu di u casale. Pò fà sapè à i Corsi tale è quale avemu truvatu a stituzione, sopratuttu nant’à u puntu finanziariu… catastròficu.

Vole à tempu dà attenzione à u persunale, porghje a manu à l’uppusizione, è dà di pettu à i capatoghji di a Corsica : lozzi, trasporti, derive sucietale, messa in ballu di e discussioni di l’urdunanze cù u guvernu. Tuttu què dumanda travagliu, eppò travagliu… ma sapemu fà ! Allora, o ghjente, ùn v’inchietate, ci avemu da ghjunghje. Avemu solu u bisognu d’una cosa impurtantìssima per riesce : un investimentu militente nant’à u terrenu… aduprate a stessa andatura, sparghjìtevi, spiecate, accumpagnate, fate a lea cù u nostru pòpulu è vidarete e maraviglie chè no faremu inseme ! Aiò ch’hè ora !

Fabiana Giovannini.

à suivre sur  l'application android Unità Naziunale ou bien sur ce lien mobile (Apple, tablettes...)