Produit CORSU E RIBELLU
Tuttu u mondu a sà chè i respunsevuli francesi di u ghjoc’à ballò, ùn ci tenenu micca cari. Basta a fighjulà u rispettu ch’elli t’anu dopu avè dicisu a prugrammazione d’una ghjurnata di campiunatu u cinque di maghju (a 36esima).
Lauda è Ghjaseppa, e duie fighjole di u tintu Petru-Ghjuvanni Guidicelli -una di e 18 vittime in u 1992, in Furiani– è Francescu, u so cuginu, anu dicisu di battesi per unurà a memoria di e vittime. È di fà ch’ùn si ghjucherà mai à u ballò un cinque di maghju…
Quandu a Liga cacciò u calendariu di L1 una per a stagione 2011-2012, sò stati parechji in Corsica, à palisà u fattu d’avè prugrammatu una ghjurnata di campiunatu u 5 di maghju di u 2012. À tempu, ci sarà ind’è noi, a cummemurazione di u vintesimu anniversariu di a disgrazia di Furiani. È sapemu tutti, da u cismonte à u pumonte, ciò chè riprisente sta data. Un dulore chì serà sempre vivu à long’andà. Prima, era a cuppa di Francia privista stu ghjornu quì da a federazione. Ma, dopu a stizza di i Corsi è masimu, i respunsevuli di u ballò, a FFF h di scambiò stu ghjornu. Ma di lugliu scorsu, a Liga, ci hà sciaccatu a 36esima ghjurnata di Liga una u 5 di maghju di u 2012. Chì vergogna ! In Corsica, tuttu u mondu s’hè offesu di sta decisione. Ci vole à sapè chè dopu à a disgrazia di Furiani, in 92, a federazione è a liga avianu decisu ch’alcunu scontru di ballò si ghucaria stu ghjornu. Dapoi…n’hè passatu acqua sottu u ponte. Peghju, oghje a Liga hà annunciatu chè sè no vuliamu, tutti i scontri privisti stu ghjornu ind’è l’isula pudianu esse cacciati. Ma…micca l’altri in Cuntinente (chì belezza !).
Petizione : 11000 firmate
Tandu, ci sarianu, d’un cantu, e ceremonie di cummemurazione di u 20esimu anniversariu di a disgrazia di Furiani, incù a ghjente in dolu, à d’un altru, uni pochi di squadre chì farianu a festa, ch’ella sia per a qualificazione auropeana o u mantene in prima divizione. Daretu à st’affrontu maiò- unu di più- a federazione si dicia po esse, chè, pocu à pocu, i Corsi accitarianu stu fattu. Ma, d’altronde, ùn hè mai statu questione di caccià stu ghjornu. U tempu hè passatu…sin’à a settimana scorsa. Lauda à Josepha, duie figliole di u tintu Petru Guidicelli, ghjurnalistu di RCFM vittimu in Furiani, u 5 di maghju di u 92, si sò mubilizate per dumandà u rispettu di quelli chì sò spariti issu ghjornu. « Ci vole à sapè ch’in Ingliterra, ùn si ghjoca nè u 15 d’aprile nè 29 di maghju* spiega Josepha Guidicelli, ghjè solu un affare di rispettu chè noi dumandemau » Ma, per ciò chì tocca à ella, a Liga cuntinueghja ind’è i so rapporti diciaremu « particulari » cù a Corsica. Face u « chjam’è risponde » incù a Federazione, unu mandendu versu l’altru.
Un duvere di memoria
« Vulemu unurà a memoria di tutti quelli chì so morti u 5 di maghju di u 92 in Furiani. Ùn si po pinsà chè si ghjucherà à u ballò un 5 di maghju in a Francia sana. Stu duvere di memoria hè necessariu. » E duie surelle, incù u so cuginu Francescu anu principiatu a so mubilisazione inc’una petizione. Una settimana dopu, più di 11000 persone l’anu zifrata. Ma l’affare, ùn s’arresta micca quì. L’eletti di Corsica si sò impegnati. Anu vutatu una muzione dumandendu a i respunsevuli di u ballò francese (a Liga è a Federazione) di dichjarà di manera ufficiale cum’è una « ghjurnta bianca » ogni 5 di maghju. Ghjurnalisti, anziani ghjucadori, pulitchi, tutti sustegnenu sta petizione. Pocu à pocu, si sviluppa ancu fora di Corsica. Basile Boli, ghjurnalisti di « L’équipe » o di « France Football », participeghjenu à sta demarchja. Ghjè, cum’è d’altronde, in Ingliterrra, un dolu naziunale ch’ùn po esse limitatu à a Corsica. È s’ellu hè limitatu, vale à dì chì a Corsica hè spiccata da a Francia è chì e regule, ùn sò micca li stesse. Ma chì sarianu state e decizione di a Federzaione è di a Liga sè a disgrazia er’accaduta in Gerland, Bollaert, Geoffroy-Guichard o ancu u Parc des Princes ? A rispotta, noi altri Corsi, a cunniscimu. A mubilis azione hè stata principiata in Corsica. Aspittemu, avà, ciò ch’anu da fà i respunveli di u ballò francese…
F.P. pour le JDC le 8 décembre 2011
*U 15 d’aprile di u 1989, in Hillsborough, nanzu una partita trà Nottimgham Forest è Liverpool, 95 parsone sò morte ciaccate.
U 29 di maghju di u 1985, nanzu a finale di a cuppa d’Auropa trà a Juventus è Liverpool, 39 parsone sò state tombe dopu à una baruffa.
(…)
CorsicaInfurmazione.org by @Lazezu
Revue de Presse et suite de l’article :
JOURNAL DE LA CORSECorsica Infurmazione: l’information de la Corse, des Réseaux sociaux et des Blogs politiques [Plateforme Unità Naziunale]
