Produit CORSU E RIBELLU

X

Cum’è un uchjata di u destinu, u Sporting hà sceltu l’anniversariu di vinti anni di i a disgrazia di Furiani per vultassine, dopu à sett’anni di galera in Liga duie è in Naziunale, in prima divisione. Ancu s’è a Corsica sana festighjeghja stu passaghju, nimu ùn s’hè scurdatu di ciò chì s’hè passatu vint’anni fà in Furiani.

Marti u 5 di maghju di u 1992. Divia esse una festa maiò. A festa di u ghjoc’à ballò corsu. Dui anni dopu à esse ghjunti in Mezavia in 16ma di finale di a cuppa di Francia, l’OM, à l’epica una di e squadre e più forte di u vecchju cuntinente (facia tremulà l’Auropa sana) sbarcava in Furiani incù tutti i so ghjucadori gloriosi : Papin, Mozer, Deschamps, Pelé, Waddle, Olmeta è tant’altri. Ma per disgrazia, è soprattutu par l’intaressu suldarinu è a scimità d’uni pochi, sta festa hè divintata un veru spaventu : 18 morti, più di 2000 feriti, trà elli, certi ùn marchjenu più. Oghje, certe dumande stanu sempre senza risposte. Parchì fà una tribuna cusì à a lestra in cinque ghjorni quandu u capitanu di i gendarmi dicia, à l’epica, chì ci vulia, di regula, un mese, per fà una tribuna capace di sustene 10000 parsone. Vint’anni dopu, chì ferma di u drama di Furiani ? Un ricordu c’h’ùn si spinghjerà maì. S’è noi pigliemu l’esempiu di u Heysel o di Hillsborough, si vede chè d’un cantu, ghjè una baruffa chì schiatta à l’origine di u drama, di l’altru un sbagliu (lascià entre troppu parsone à tempu). Mentre ch’in Furiani, ghjè l’intaressu suldarinu, a necessità d’arricchiscesi, pocu impreme a securità di a ghjente, chì era di primura. Un altru puntu impurtante, stà dinò u prucessu chì seguitò. Quì, e famiglie di e vittime, ùn aspittavanu micca soldi ma risposte chjare à e so dumande. S’aspittava à u prucessu ghjustu è sintenze in leia cù a disgrazia. Omi sò respunsevuli di a morte di parsone ch’eranu ghjunti certi, per fà u so mistieru, è tutti per participà à una festa maiò. Nè per more, nè per esse feriti, nè per campà ciò ch’ anu campatu stu ghjornu. Oghje, nim’ùn si n’hè scurdatu. È ancu s’è a Corsica sana si rallegra di vede u Sporting di Frédéric Hantz in Liga una, s’è i Turchini aprenu forse un’antru avvene incù dirigenti schietti, u publicu ritruvatu, d’altri scopi, u ricordu di a disgrazia di Furiani hè sempre vivu in a memoria di tutti.

F.P. pour le JDC en mai 2012

(…)

CorsicaInfurmazione.org by @Lazezu 

Revue de Presse et suite de l’article  : 

JOURNAL DE LA CORSE

Corsica Infurmazione: l’information de la Corse, des Réseaux sociaux et des Blogs politiques [Plateforme Unità Naziunale]