X

Dipoi u 2011, à l’Assemblea di Corsica, l’eletti – a maiò parte in parechji occasione omancu – anu pigliatu decisione fundamentale per l’avvene di u Populu Corsu. Ùn ammenteraghju quì chè u votu di a dumanda di cuufficialità è quella di a necessità d’un’evuluzione di u statutu particulare.

Cusì chì a simana scorsa, in Parigi, dui ministri anu ricevutu una delegazione di l’eletti corsi. U cumunicatu di Femu A Corsica esciutu stamane palesa a manera strana ch’ella hè stata cumposta sta « squatra », induve quelli chì s’opponenu à l’evuluzione stituziunale ci eranu quasi tutti, invece chì quill’altri eranu sotturiprisentati. In passu in daretu per ricurdà chì in Aiacciu eranu quantunque 45 à prò è solu 6 contru…

Più in là, si pò dumandà omu cum’ellu capeta quì stu calendariu prupostu da i ministri. In fatti ùn si sà quand’ella s’hà da finisce a prima tappa. Più bella, si parla di cuntrastà omancu sin’à u 2016. Pezzi ! L’affari sò in francese, più chè mai… S’omu seguita ciò ch’ellu hè statu dettu da u Statu – à mè mi pare un fattu strasurdinariu – hè ch’ella serà un’antra assemblea di Corsica, eletta in u 2015, chì tratterà tutte ste quistione mentuvate più sopra, cù quella di u PADDUC in più.

O zitè, «ci portanu da u fica à u peru», cum’elli a facenu dipoi più di 40 anni, cù a cumplicità d’una mansa d’eletti suddisfatti – ma di chè ? –. Anc’assai ch’è ùn simu à l’affollu di certi « riprisententi di u Populu Corsu », unipochi di port’à pasce incustumati è incravattati chì sò vultati più chè cuntenti da Parigi… « Ùn hè più tempu di sonnu » : ùn accettemu micca sta manera ch’elli anu certi capizzoni quand’elli « pratendenu » di difende a Corsica. Nè mancu ùn suppurtemu più sta « superba ministeriale » chì vole gestice a Corsica da maestri.

Femucila corta, ùn simu sicuri di sbuccà cusì faciule è à cortu andà, malgradu e magiurità aiaccine. À l’eletti chì portanu a spera di a Nazione Corsa di falla capì bè à tutti quessi, ch’elli sianu in Aiacciu, in Parigi o sippuru in’altrò. È quessa, l’avete capita o amichi, seria propiu ora ! À ch’hà tempu ùn aspetti tempu…

Saveriu Luciani

(…)

by @Lazezu 

Revue de Presse et suite de l’article  : 

sur Corse Matin, sur Alta Frequenza, sur RCFM, Sur Corsica, Sur le Journal de la Corse, Sur Alcudina, sur Corsica Infurmazione/Unità Naziunale, sur France 3 Corse, Sur Corse Net Info (CNI)

Corsica Infurmazione: l’information de la Corse, des Réseaux sociaux et des Blogs politiques [Plateforme Unità Naziunale]

à suivre sur  l'application android Unità Naziunale ou bien sur ce lien mobile (Apple, tablettes...)