X

Sta simana u giru di Francia ghjunghje in tarra corsa. Sti pochi anni u parcorsu hè sempre partutu d’un paese stranieru, quest’annu anu sceltu di vene in Corsica, anu infine capitu chì a Corsica ùn era a Francia.

Si pò vede fiurisce per isse strade rifatte à novu parechje magliette, affissi, deviazione, chì ci facenu capì dapoi un mese chì durante 3 ghjorni i corsi ùn averanu ch’un dirittu : quellu di sciaccamanà è di stà muti. Ch’ella venghi una cumpetizione spurtiva di livellu internaziunale, perchè micca. Ma cum’è i Brasiliani per via di l’urganisazione di a coppa di u mondu di ballò, ci punemu a quistione : chì saranu e cunsequenze per a Corsica ?

Centine di millaie di turisti d’un colpu in trè ghjorni ch’imbruttaranu di sicuru ancu di più a natura è risicheranu di fà parte l’incendii, e strade e più impurtante tagliate ghjurnate sane incù una situazione chì sbuccierà nant’à una panicca nera in ogni scornu di l’isula, rinforzii di pulizza incredibuli cum’è s’ellu ùn ci n’era abbastanza, soldi spesi di manera sprupurziunata senza chì i corsi sippianu tinuti à capu.

ghjuventuindipendentistalogo2013

Sti millioni spesi per accoglie u Giru di Francia anu, secondu à l’eletti, da ricascà à u doppiu in e stacche di a Corsica. Ci cridimu pocu. Tutt’e studie previsiunale di e ricascate ecunomiche pè cumpetizione internaziunale urganizate in i paesi sò state infirmate da i sciffri in a realità, cum’è a coppa di u mondu di Rugby di u 2007 in Francia per esempiu. A Corsica ùn sarà più ricca nè più felice dop’à u Giru. Sarà forse ghjustu più brutta.

A Corsica paterà gravemente di issi 3 ghjorni, è ùn puderà gode di nulla di più dopu à a vinuta di i ciclisti. In più di tuttu, u statu dumanda à i Corsi d’ùn fassi rimarcà (ma què, sarà forse u più difficiule).

A Ghjuventù Indipendentista piglia dunque u partitu di ponesi e vere quistione in giru à u Giru : à quale prufitterà st’evenimentu ? Perchè tanti rinforzi di pulizza ? Per cuntene e rivindicazione di l’indigeni ? Perchè stu disprezzu di pettu à u populu corsu ? Perchè ùn averebbemu u dirittu di rimette in causa i benefizii di issa cumpetizione in Corsica ?

L’avvene ci darà forse parechje risposte, ciò chì hè sicuru hè chì u Giru di Francia ùn hè un’affare tutalamente pusitivu pè a Corsica cum’è certi, eletti lucali o intraprese francese, ci volenu fà crede. In tutti i casi, chjamemu a pupulazione corsa à sparte i missaghji rivindicativi in bor’di strada, annant’à u parcorsu, incù una parolla cumuna da sparte dinù nant’à e rete suciale : #CorsicaIsNotFrance, per chì u mondu sanu possi capì qual’è no simu !

Ghjuventù Indipendentista

(…)

by @Lazezu 

Revue de Presse et suite de l’article  : 

sur Corse Matin, sur Alta Frequenza, sur RCFM, Sur Corsica, Sur le Journal de la Corse,
Sur Alcudina, sur Corsica Infurmazione/Unità Naziunale
, s
ur France 3 Corse, Sur Corse Net Info (CNI)

Corsica Infurmazione: l’information de la Corse, des Réseaux sociaux et des Blogs politiques [Plateforme Unità Naziunale]

à suivre sur  l'application android Unità Naziunale ou bien sur ce lien mobile (Apple, tablettes...)