Più di trè centu parsone si sò adunite, sabbatu scorsu in Aiacciu, per a difesa di a lingua corsa. Fora di a riesciuta di sta manifestazione -fatta in quadru d’una demarchja culletiva di tutt’ i rughjoni impegnati-, u culletivu « Parlemu corsu » respunsevule di s’adunita, chjama dinò i candidati à l’elezzione. S’aspetta, avà, un statutu di e lingue minuritarie…
Una catena uma di 800 metri, partendu da i prifettura sin’à l’assemblea di Corsica, numarosi pannelli, affissi, ecc, ecc, una ghjurnata bella assulanata, a manifestazione privista dapoi parechje settimane hè stata una riesciuta. À tempu, in d’altre cità di Francia (Strasbourg, Toulouse, Bayonne, ecc), stu ghjonu cumunu decisu da i rughjoni impegnati per a difesa di a so lingua, c’era una manifestazione.
In Aiacciu, è sottu una rivindicazione maiò « lingue, culture, diritti, una legge », ghjente passiunati da a lingua corsa, cunnisciuti (Edmond Simeoni, Pierre Ghionga, François Alfonsi, Nadine Nivaggioni, Jean Biancucci, Tumasgiu d’Orazio, André Paccou) o micca, si sò adunite senz’alcunu scopu puliticu. « Inseme, spiega Micheli Leccia, presidente di u culletivu, cù l’altri rughjoni, avemu dicisu di fà un culletivu maiò, battizatu « culletivu di u 31 di marzu ».
Chjamemu tutti i candidati à l’elezzione per dumandali un statutu di cuufficialità di tutte ste lingue. In Corsica, chjamemu di sicuru u Statu ma dinò l’eletti di u rughjone. Avemu, di sicuru, francatu qualchì passi, ma ùn basta micca. Anu i mezi di fà ancu di più. » E rivindicazione, ùn mancanu micca, in leia cù sta manifestazione : immersione à u nivellu di i sculari, furmazione obligatoria ind’è l’imprese per ghjunghje, pocu à pocu, à una vera sucietà bislingua.
« È per quessu, ripiglia Micheli Leccia, chì ci vulerà à sviluppà d’altri mezi. » A manifestazione di sabbatu scorsu hà permessu di francà, cù più di 300 parsone -centu à u più eranu priviste à principiu-, un passu impurtante. A mutivazione, ùn manca, ogni ghjornu, i Corsi s’impegnanu per a salvezza di a lingua. Una lingua, più chè mao, viva… ancu s’è a lotta cuntinueghja.
http://www.jdcorse.fr/JDC2/Mubilisazione-int-ornu-a-a-lingua
*Vous aimez cet article ? Faîtes-en profiter vos amis !
Faites passer l’information autours de vous en cliquant sur :
Produit CORSU E RIBELLU
