Di lugliu scorsu, l’Assemblea di Corsica hà vutatu una muzione di Corsica Libera dumandendu l’ufficialisazione di a lingua corsa. L’esecutivu hà ancu fattu soiu sta vechja rivendicazione, purtata eri da u muvimentu naziunale solu, chì face oghje parte u so fogliu di strada.
Malgratu l’evuluzione di e pusizione linguistiche di i pulitichi corsi, a Francia hè più chè mai chjosa à qualunque idea di ricunniscenza di a so diversità culturale, quessa à nome di l’universalisimu di a custruzione naziunale francese contr’à e minurità culturale. Ind’è a classa pulitica francese, sta visione trapassa di manera larga i quadri ideulogichi di diritta o di manca. E dichjarazione, intinte di disprezzu, di Mélenchon quant’è quelle fulclorizante di i candidati Sarkozy, Hollande o Le Pen a ci rammenta.
Ancu l’articulu 75 di a custituzione francese vutatu in u 2008 ùn scambia propiu nunda à u statutu ghjuridicu di a lingua corsa. U Cunsigliu Custituziunale hà rammintatu chì ste dispusizioni ùn lasciavanu nisun dirittu à i lucutori.
U statutu chè no vulemu per a nostra lingua abbisogna di piglià misure ambiziose chì dessinu mezi, diritti è uppurtunità d’aduprà u corsu à i Corsi, quale ella sia a so urigine, mezi è duveri à l’istituziuone o l’imprese in fatti di furmazione, di ricrutamentu, d’accolta, di cummunicazione è di travagliu in lingua corsa.
Solu l’ufficialità di u Corsu, scritta ind’è una dimarchja di rigulamentu puliticu di a quistione naziunale, ci pò permette di rende à a nostra lingua a su postu à u centru di a vita publica è privata.
Perchè di tene a nostra lingua viva participeghja à u ligame suciale in a nostra sucetà, perchè hè una furtuna in un Auropa è un mondu plurilinguu, perchè ghjè di a nostra rispunsabilità di prumove stu tesoru, lascita di i nostri antichi chì anu fattu sta tarra, Corsica Libera chjama à participà à a manifestazione di u 31 di marzu in Aiacciu incù u Cullettivu Parlemu Corsu.
Corsica Libera
*Vous aimez cet article ? Faîtes-en profiter vos amis !
Faites passer l’information autours de vous en cliquant sur :
Produit CORSU E RIBELLU
