Produit CORSU E RIBELLU

X

(Unità Naziunale – 15 novembre 2015) Passani l’anni, ma ferma sempri u ricordu. Omu di prima trinca, ti ni sé andatu troppu prestu, assassinatu. U to sangu s’hè spartu in a noscia  tarra comu l’acqua curri in i vadini.
Chi piu bedda  ghjustizia omini ti si po renda si un hè a libartà di u to Populu ? Quiddu pà u  quali ti sé ingaghjatu ghjovanu ? Quiddu pà u quali hai presu a machja ? Quiddu pà u quali sè mortu in pien’azioni ? Hè sacrifiziu ciò chi  hai fattu pa’issu Populu. Hè dinò un asempiu sputicu di lotta purtata da l’unestà e micca altri intaressi chi issu bè cumunu di tutti i corsi. Eri un omu appassuniatu ch’un capìa micca l’inghjustizia fatta à i paisani.

Tantu chi un Populu si batti pà campà libaru in tarra soia ùn si po dì chi ti ni sé andatu par nudda pà u più lungu di i viaghja . U to missaghju, i to idei si so oramai arradicati. So cum’issi casti  chi saltani da un locu à l’altru  è mantenini u focu accesu

AcquavivaFLNChommage

Ma ùn ci hè lumu senza bughju …

A lutta  pà firmà cio chi no semu, porta dinò in sè  sta rimigna avvilanata chi ci voli spiccà è sdrughja. Postu chi in l’ingannu, ci so oramai e torna famiddi addulati parchi quiddi chi si diciani frateddi di pettu à u Statu francesu si so tumbi tra iddi…

o sempri lunghi e pitricosi i stradi chi portani a l’appaciamentu di tutti. E oghji curri sempri u sangu in Corsica, a mezzu a una suciità svrimbata, in i trappuli di i manipulazioni francesa…

U to sognu ùn hè ancu  duvintatu rialtà. Quantunqua u to sognu hè avali spartutu da milliaia e milliaia di corsi, ghjovani é vecchji, omini e donni, pà i  quali l’usu di a lingua hè cultura di scambii. Pà quali a maestria è u rispettu di a tarra hè passu d’avvena. Pà i quali  a ricuniscenza di u  Populu hè simbulu di libartà. Cio chi l’era a to speranza spampilluleghja in tutt’issi occhji ghjirati vers’a altri lindumani.

Quiddi chi oghji portani sempri a lotta com’è te tandu hani a rispunsabilità storica di dà à u Populu l’arnesi pà spannassi da par iddu. Hani u duveri tremendu d’appaccià à tutti pà ritruvà una Corsica sana.

Un basta à parlà di paci e d’amnistia  primurendusi supratuttu di truvà un pusatoghju à l’assemblea … E a forza di pinsà à pusà si smintica ancu a filetta…

Spartu incu tecu, Ghjuvan Battista, issa vodda di riescia, di vincia e di custruiscia ‘ssa Corsica chi moscia a u mondu intrevu ch’idda si po svilluppà da par idda, comu Nazioni libara. In a morti sé un simbulu di vita.

A tutti i martiri di a nosscia lotta. U populu corsu camparà.

Ulivieru Sauli.

14 novembre 2015