X

(Article du 24 janvier 2017)  » Macchja, n’avemu un antra… ». Hè u titulu di a magnifica puesia di Ghjuvan Teramu Rocchi è cantata da a Filetta. Hè dinò incù ‘ssa citazioni chi vurraria ramintà à « Dédée ».

O piuttostu a noscia « Dédée ». Macchja, n’avemu un antra. Fatta di tutti ss’aghjenti, bravi, simplici d’aspettu, ma ricchi in u so cori. Di tutt’ss’aghjenti chi, quandu seti cunfruntati à l’inghjustizia, quandu seti quasgi soli, quandu seti purtati da u sfughjime, v’aprini a porta di a so casa, induva dapoi tempi è tempi ci hè sempri statu un piattu in piu. V’aprini a so casa parchi par iddi hè naturali. Vi danni da bia e da manghjà e vi lacani un lettu pà dorma. Era cussì « Dédée ».

Un vi punia nisciuna quistioni, e un dumandava nudda. U so solu pinseri era di regalavi un aggrutatoghju. Pugnaia sempri di fa bè, e di sparta u bè. Macchja n’avemu un antra. Ricca d’issi parsoni straurdinarii chi arrichiscini a voscia vita. Incù « Dédée », era un amparera cutidiana di ciò chi faci a noscia cultura. Tutti i gesti di ogni ghjornu erani pinsati e ditti in corsu. Più che l’amicizia, piu che a famidda, « Dédée » purtava l’indiscrivibili anima corsa, quantu passiunanti che misteriosa.

Era di sta sterpa « Dédée ». Un cuncipia né l’iniquità né u mali. Ha educatu tutti i soia in u rispettu di tutti e in u spiritu di spartera. L’aiutu è a sulidarità erani nurmali. E quant’aghjenti sò vinutu in casa soia ancu da luntanu, sin da l’America, ié l’America, pa’ truvà risposta à i sò interrugazzioni o pà ritruvà ‘ssu calori umanu chi manca tantu oghji. « Dédée » curava l’aghjenti. Era signadora. Macchja n’avemu un antra. Fatta di tutt’ssi parsunalità chi v’insegnani u sensu prufundu di a vita è ciò chi faci u nosciu stintu. Un li sintiti micca, un li viditi mai, ma basta ch’iddi v’aprissini i sò braccia un ghjornu e tandu, scupriti tutta a ricchezza umana criata da Diu. Ma si n’hè andata « Dédée ».

Ci ha abbandunatu in ‘ssu mondu, lachendu ci u so missaghju di vita è d’amori. Ci ha abbandunatu po essa troppu prestu, ma in qualchi cantu di u me pinsà sò quasgi sicuru chi da induva idda hè oramai, e in l’eternità cuntinuighja à fà ciò ch’idd’ ha sempri fattu : pugnà di fà u bè. D’induva sé o Dédée, schiarisci i nosci passi !

« Ghjaseppu »


Si hè morta Andrea Branca ditta « Dédé » mamma di l’anziana vici prisidenti di l’APC Maria Claudia Branca. Era una figura di a Tirnità di Purtivechju tistimogna di l’anima corsa. Prisintemu a tutta a so famidda fiddoli è bisfidolli i nosci sinceri cundulianzi
Associu di i Parenti Corsi

à suivre sur  l'application android Unità Naziunale ou bien sur ce lien mobile (Apple, tablettes...)